سورس: Wikipedia Commons

دوحہ (ڈیلی پاکستان آن لائن) قطر ایئرویز کی دوحہ سے وینس جانے والی پرواز میں ایک مسافر خاتون دورانِ پرواز بے ہوش ہو کر انتقال کر گئی جس کے بعد ایک جوڑے کو باقی سفر اس کی لاش کے ساتھ بیٹھ کر گزارنا پڑا۔

آسٹریلوی نیوز آؤٹ لیٹ نائن کے مطابق خاتون باتھ روم سے نکلنے کے بعد اپنی نشست کے قریب گر کر بے ہوش ہو گئی تھی۔ عملے نے فوری طور پر طبی امداد فراہم کرنے کی کوشش کی لیکن انہیں کامیابی نہیں ملی۔محدود جگہ کی وجہ سے عملے نے لاش کو قریبی نشست پر بٹھا دیا۔ یہاں آسٹریلوی جوڑا مچل رنگ اور جینیفر کولن پہلے سے موجود تھے۔ رنگ نے بتایا کہ یہ واقعہ نہایت دل خراش اور پریشان کن تھا اور وہ اس بات پر حیران تھے کہ لینڈنگ کے بعد بھی انہیں لاش کے ساتھ بیٹھے رہنے کے لیے کہا گیا۔

مچل رنگ تقریباً چار گھنٹے تک لاش کے ساتھ بیٹھے رہے یہاں تک کہ طیارہ لینڈ کر گیا۔ لینڈنگ کے بعد بھی انہیں اس وقت تک اپنی نشست پر رہنے کی ہدایت کی گئی جب تک کہ طبی عملہ آ کر لاش کو لے نہ گیا۔ اس دوران ان کی اہلیہ کولن کو ایک اور مسافر نے اپنی نشست پیش کر دی۔ قطر ایئرویز اور قنطاس ایئرلائن، دونوں نے اس واقعے پر افسوس کا اظہار کیا۔